'PATOIS', NON PAS ! OCCITAN, ÒC PLAN !

D'aiçiant'a la debuta dau secle XX, la lenga que se parlava per tot lo monde, en Lemosin Bas (aura lo despartament de la Corresa), era l'occitan lemosin. Quela lenga se parla d'enguera dins lo 1/3 sud de la França de Bordeu a Niça e de Narbona au nòrd d'a Limòtges.

Lo Lemosin aviá conegut la gloria au secle XII per amor qu'era lo bres daus trobadors coma Bernard de Ventadorn, Gaulcem Faidit, Guiraud de Bornelh (a la broa dau Lemosin Bas), que chantaven l'Amor e lo Pretz dins la nostra lenga. Aura la cultura occitana s'es abasada e la gent parlan pus que lor 'patois' coma disen perque l'escòla lor donet la vergonha de lor lenga. Au jorn d'auei, en Corresa, i a d'enguera beucop de monde per batalhar en occitan mas subretot esconduts dins los ostaus…Vos diran que lo 'patois' chamja tot lo temps e que se comprenen pas coma los vesins. Mas chau anar dins las Valadas Occitanas d'Italia per parlar un occitan força parier au nòstre ( disen 'las chabras' per exemple, qu'es de Nord Occitan). I a de segur mens de diférençia entre los occitans per barjaçar, qu'entre un tipe de Londre e un texan dau USA per parlar angles. Per roinar la lenga, l'escòla anciana conhet dins la testa daus dròlles qu'era pas una lenga vertadiera, mas un 'patois'… Mas aura, quò es possible de far de l'occitan de las Classas Mairalas d'aiçanta a l'Universitat. Podem ben platussar dins quela lenga e quò s'apren… e mas ieu, dise pas que parle un 'patois' angles perque escharonhe la lenga de la reina. Quò es pas complicat de legir l'occitan e si sabetz legir en frances, ne'n chau pauc de temps per rentrar dins quela literatura miraudiosa. Podem parlar de la vita moderna perque lo quite vocabulari tecnique dins las lengas romanas dau Sud de l'Euròpa. Sus la 'List oc' d'internet, chascun escriu dins sa lenga mairala romana e tot lo monde se compren ; per nosautres europenc d'aquí, quò es l'avenidor. Lo 'patois' barra la via, l'occitan nos dreiba lo monde de la comunicacion.

Tenetz vos fier !
Ivon

Per mai d'entresenhas,

podetz m'emailar a : Cet e-mail est protégé contre les robots collecteurs de mails, votre navigateur doit accepter le Javascript pour le voir